Bericht von HB3YAM Vreni:
Isers Rele uf em Totzweg het den Geischt wärend em QSO zwischen HB3YHV und HB9BEN ufgän. Alex HB3YIR ischt am Fritig eis afen uehi ga gschouen, hed zwar de Fäler gfunden aber niid chenne machen. Rele ischt Total tod und der GSM Schalter geid o nimma. BEN und i hein bschlossen, mier probieren am Sunndig uehi ds chon. BEN stelld isers zweita Rele uf 70cm Frequänz um probierd ob als lauft und macht GSM-Schalter und wärchzig parad. Schnee hets allwäg nid en grossa Huufe, es selti gan. Mier packen zforbereitete Rele und Wärchzig in alten Militärrucksack. D Gresi passt haargenau wie darfir gmacht.In e zweita Rucksack tiemmer o eppis Zässen und den GSM Schalter laden. Bis dert wa sich Strass teild chenne mer fahren. Zum cheren heimer den no träbels. Us ner veriischten Fahrrinne chund isa Subi ohni stosse vor YAM nid usa. Mier parkieren e paar Meter wiiter api. D’Ruckseck wärde montierd u de chas los gahn. Es geid rächt gued. Zytewiis hets fascht ke Schnee aber albeneis rächt vil. Zum Glick ischt där hert u mir versinken numme schueteif. Doben aacho heimer en Bitz chald, drum ischt äs heisses Gaffee mid Schnee gmacht bsunders gued. Na eppa driine Gaffe heimer umhi warm gnueg. Im Herbscht heimer Gaffeepulver, Tassleni und e Chocher im Releschaft ¨versteckt¨. BEN hed ds Rele gwächsled u verdrahted. Da hed er no miessen improwisieren wil en ganz chliina Schrubenzieher heimer nid derbie ghäben. Aber alls ischd gued und äs funktionierd umhi. No äs probe QSO mit HB3YIR gmacht und den GSM Schalter probewiis aktiwierd und alls ischt gued. Gmietlich simer desab gägen hein. E chli stolz siimer scho, das mier das gschafft hein.
Merci Vreni vier din Isatz!